ബുധനാഴ്ച, ഏപ്രിൽ 11, 2012
അധാര്മികതക്കെതിരെ ശബ്ദമുയര്ത്താന് എല്ലാവര്ക്കും ബാധ്യതയുണ്ട്-കാന്തപുരം
കാസര്കോട്: സമൂഹത്തില് അധാര്മികതയും അരാജകത്വവും തഴച്ചുവളരുന്നതിനെതിരെ സത്യ വിശ്വാസവും മാനുഷിക മൂല്യങ്ങളും ഉയര്ത്തിപ്പിടിക്കുന്ന ഒരു നവ സമൂഹ സൃഷ്ടിയാണ് കേരളയാത്ര ലക്ഷ്യം വെക്കുന്നതെന്ന് സമസ്ത കേരള ജംഇയ്യത്തുല് ഉലമ ജനറല് സെക്രട്ടറി കാന്തപുരം എ.പി അബൂബക്കര് മുസ്ലിയാര്. കാസര്കോട് പ്രസ്സ് ക്ളബില് ബുധനാഴ്ച രാവിലെ നടന്ന മീറ്റ് ദ പ്രസ്സില് സംസാരിക്കുകയായിരുന്നു അദ്ധേഹം. ബുദ്ധിയും വിവേകവും നല്കപ്പെട്ട ഏക സൃഷ്ടിയായ മനുഷ്യനില് നിന്ന് നന്മ മാത്രമാണ് ഉണ്ടാവേണ്ടത്. എന്നാല് മനുഷ്യനെ തിന്മയിലേക്ക് വലിക്കുന്ന ശക്തികള് സജീവമാണിന്ന്. ഓരോ മതങ്ങളും അവരുടെ വിശ്വാസങ്ങളും സംസ്കാരങ്ങളും സംരക്ഷിക്കാന് മാനവികത മുറുകെ പിടിക്കണം. മനുഷ്യത്വ രഹിത പ്രവര്ത്തനങ്ങളുണ്ടാകുമ്പോഴാണ് പ്രശ്നങ്ങളുണ്ടാകുന്നത്. കക്ഷി രാഷ്ട്രീയഭേദമന്യേ കേരള യാത്രയെ എല്ലാവരും വരവേല്ക്കുമെന്നും കാന്തപുരം പറഞ്ഞു. വരും ദിനങ്ങള് കേരളം അതിനു സാക്ഷിയാകും. ആഭ്യന്തര വകുപ്പ് വിചാരിച്ചാല് മാത്രം ഇവിടെ പൂര്ണ സമാധാനം ഉണ്ടാകില്ല. മനുഷ്യത്വം ഉയര്ത്തിപ്പിടിച്ച് എല്ലാവരും രംഗത്തിറങ്ങണം. ആ ബാധ്യതയാണ് താജുല് ഉലമ നേതൃത്വം നല്കുന്ന സുന്നി പ്രസ്ഥാനം ഏറ്റെടുത്തിരിക്കുന്നത്. പ്രസ്സ്ക്ളബ് പ്രസിഡന്റ് കെ. വിനോദ് ചന്ദ്രന് അധ്യക്ഷത വഹിച്ചു. പ്രസ്സ്ക്ളബ് ജനറല് സെക്രട്ടറി മുഹമ്മദ് ഹാശിം സ്വാഗതവും സെക്രട്ടറി അബ്ദുറഹ്മാന് ആലൂര് നന്ദിയും പറഞ്ഞു. വി.വി പ്രഭാകരന് കാന്തപുരത്തിനു ഉപഹാരം നല്കി. സുലൈമാന് സഖാഫി മാളിയേക്കല്, പള്ളങ്കോട് അബ്ദുല് ഖാദിര് മദനി, ബി.എസ് അബ്ദുല്ലക്കുഞ്ഞി ഫൈസി. ടി. മുഹമ്മദ് കുഞ്ഞി ഹാജി തുടങ്ങിയവരും സംബന്ധിച്ചു. 11/04/2012
ഇതിനായി സബ്സ്ക്രൈബ് ചെയ്ത:
പോസ്റ്റിന്റെ അഭിപ്രായങ്ങള് (Atom)
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ